ಗುರಿ ಇರಬೇಕು ಬಾಳಿಗೆ
ಛಲವಿರಬೇಕು ಜೀವಕೆ|
ಗುರಿ‌ಇರದ ಬಾಳಿಗೆಲ್ಲಿದೆ ಕೊನೆಯು
ಛಲವಿರದ ಜೀವಕೆಲ್ಲಿದೆ ಬೆಲೆಯು|
ಗುರಿ ಬೇಕು ಗಂಡಿಗೆ, ಛಲಬೇಕು ಹೆಣ್ಣಿಗೆ||
ಅತ್ತ ಇತ್ತ ಹರಿದಾಡುವ ಮನಸ
ಅಂಕೆಯಲಿಡಬೇಕು|
ಆಸೆ ಆಮೀಷಕೆ ಅಧೀನವಾಗದ ಹಾಗೆ
ನಿಗಾವಹಿಸಲುಬೇಕು|
ಪ್ರತೀ ಕ್ಷಣವು ಅರಿಷ್ಡವರ್ಗಾದಿಗಳ
ಹಿಡಿತದಲ್ಲಿಡಬೇಕು||
ಗುರು ಹಿರಿಯರನು ಅನುಸರಿಸಿ
ಉತ್ತಮ ಮಾರ್ಗದಲಿ ಬದುಕಬೇಕು|
ಎಷ್ಟೇ ಕಷ್ಟಗಳು ಬಂದರೂ ಸತ್ಯ
ಧರ್ಮದಲಿ ನಡೆಯಲುಬೇಕು|
ಇದ್ದುದರಲ್ಲಿಯೇ ಸುಖವನು ಕಂಡು
ಸಂತೃಪ್ತಿಯ ಹೊಂದಬೇಕು||
ಅಲ್ಪತನಕೆ ಆಸ್ಪದವ ನೀಡಬಾರದು
ಹಾಸ್ಯಕೂ ಎಂದು ಅಸತ್ಯವನಾಡಬಾರದು|
ಸಜ್ಜನರೊಳೊಂದಾಗಿ ಬಾಳಿ ಬದುಕಬೇಕು
ಅಚ್ಯುತ ಅನಂತನ ನೆನೆ ನೆನೆದು
ಬಾಳಗುರಿಯ ಸೇರಲು ಬೇಕು||
*****
